da il Diari An IV, Numar 21 dal 4 di novembar 2009

Salacor no ducj chei che a passin dongje il tor di Puarte Vilalte a Udin a san che dentri si cjatin i uficis di une des plui mertoriis associazion di volontariat culturâl dal Friûl: la Societât Furlane di Archeologjie, che propit chest an e fiesteze i prins vincj agns di ativitât.

Il so president Gian Andrea Cescutti nus fevele dai travuarts fint chi tocjâts ma ancje dai problemis che si cjatin denant.

Ai 7 di Novembar le Societât Furlane di Archeologjie a fas fieste pai XX agns di “Volontariat Culturâl”. Un biel travuart.

Sigûr. Vincj agns a son passâts: al inizi lis istituzions a difidavin de presince di volontariis come noaltris. Vuê come vuê tant al è stât fat ma tant al è di fa: lis Sorintendencis a varessin di tignì plui in cont che volontaris spes al vûl dì ancje archeolics, int che a studiât e sore dut une risorse impuartante.

Ce ise e di ce si ocupie le Societât Furlane di Archeologjie?

Tachin cul dì che le nestre a je une societât onlus, ven a stâi cence fins di vuadagn, o contin 600 iscrits atîfs, o sin une des primis trê societâts archeologjichis in Italie..

E je articolade in cuatri sezions che a operin su progjets coordenâts de sede centrâl di Udin o a proponin lôr iniziativis.

Cui che al vîf il teritori al è secont no plui adat a tutelâ e valorizâ le storie locâl: no sin une societât verticâl.

Il stes museu nassût a Codroip al è stât in gracie dal lavôr de sezion locâl.

Altris esemplis?

In Avost si è tignût a Tumieç chel che al è stât l’ ”Avost archeologjic” cun cuindis incuintris sul teritori dai paîs ator Tumieç e de comunitât montane.

Si è rot un ‘mûr di cidin” che al permetarà di scuvierzi lis ricjecis dal sît di Verzegnis.

E tal Friûl ocidentâl?

Al Museu civic De Rocco di San Vît al Tiliment invezit si è vierte il 25 Setembar une mostre sui pês romans dal titul “Il pês inte antighitât – Misuris e struments di pesadure tal Friûl roman”: a je le prime vere jessude publiche de sezion sul so teritori e a sarâ visibil a dûc fin al 25 fevrâr dal 2010.

E tal Friûl di Jevât?

Li scuviertis no mancjin. Anzit. La sezion gurizane di San Cjanzian, par fa un esempli, a sta fasint cors e incuintris cun tant di publicazion di un libri sui “Sants Cjanzianets”.

A son stadis cjatadis tombis di doi martars di fede cristiane e di trê martars devots a Cjanzian. Un toc di storie che a je ancje le storie dal pais di San Cjanzian: une crodince par chest sant che a cjate esemplis ancje fûr de Italie e fûr de nestre regjon.

Il libri cumò publicât al tabaie des glesiis furlanis che a son stadis interessadis dal cult: e a 'nd’è in program altris. Che di San Cjanzian e sarâ cun une vore di probabilitât une sorprese pal futûr: o stin tabaiant di scuviertis tacadis za intai agns Otante.

Chi di nô ise atenzion a ce che si fâs intai sîts archeologjics?

No. Purtrop le atenzion a je scjarse. Chest an no de Societât Furlane di Archeologjie o vin lavorât a Atimis, Cjasteons sore i Mûrs, tal cjastelîr di Codroip e a Verzegnis.

In chest ultin câs o vin scuviert un sît une vore stratificât cun insediaments de etât romane, dal fiâr e dal ram. No mancjin nancje testemoneancis medievâls. Di bande nestre o lavorin in stret contat cui Museus Civics che a son titolârs des concessions ministeriâls pai sgjâfs.

Sêso atîfs ancje fûr de regjon?

Di vot agns in ca o lin in Istât a Paestum in Campanie cu lis scuelis furlanis: une biele esperience. Lôr a son grâts une vore, e an bisugne di no parcè che l’aree dai sgjâfs no à bêçs pe manutenzion e jerbe e arbui le cuvierzin. O fasin operazions di pulidure e par partecipà nol covente jessi esperts.

Chest an a àn partecipât al viaç students dal Marinelli, dal Copernico e dal Stellini di Udin: prime a jerin vignûts chei dal Percoto e chei di une scuele tecniche di Tumieç.

In Novembar, propit a Paestum si davuelzarà la Borse Mediteranee dal Turisim Archeologjic: sarêso presints ?

O jerin stâts invidats dai coleghis di Salerno za timp indaûr. Chê volte le Regjon nus veve dât une incjarie uficiâl par rapresentâle: chest an o tornin par recuperâ piçulis memoriis su la storie dai Longobarts che i grancj libris no ripuartin. La Borse e puartarà incuintris e gnovis publicazions ogni doi agns: planc planc e sta cuistant une fame internazionâl.

Si proviodin dai 200 ai 250 stand di regjons, comuns, provinciis, stâts e grops autonomots. Une grande ocasion par puartâ turiscj in Friûl Vignesie Julie.

Sigûr. Ma se si vûl fâ sul seri turisim archeologjic bisugne ancje spindi. Cence furnî al turist che al rive chi indicazions su ‘tour operator’ o dulà cjatâ di durmî al devente dut complicât. Une zornade intîrie de Borse di Paestum e je simpri dedicade ai tour operator, ma dal Friûl nol è mai vignût nissun.

Lorenzo Mansutti

il diari.pdf